Zer da Gurpilgunea?
Bizikletaren konponketa eta mantenurako oinarrizko ezagutzak ikasi eta gure tailerra zure proiektuetarako erabili nahi baduzu, egin zaitez bazkide (15 euro urtean) eta hurbildu gurera
Bizikletak konpondu, birziklatu eta berrerabiltzeko gune ireki bat baino askoz gehiago da Gurpilgunea; bizikleten inguruko eskualdeko espazio erreferentea, denoi irekia eta oinarrian jasangarritasuna duena.
Bizikleten birziklapen eta berrerabilpena indartu nahi dugu horrela. Pieza erabligarri guztiak aprobetxatu behar diren ustea dugu, eta zuk ere zure tokia aurkituko duzula gurean.
Zumardia elkartea da Gurpilgunearen sustatzailea, kirolaren alderdi ludikoa eta hezitzailea sustatu nahi duen erakundea. Natura, Kirola eta Hezkuntza batzen duen egitasmoa da hau, naturaren ezagutza eta errespetua, giza balioak, parekidetasuna eta elkarlana lantzen dituen proiektua.
PARTE HARTZAILEA
JASANGARRIA
BERTAKOA
Helburuak
Gurpilgunearen helburu nagusia, bizikletak konpondu, birziklatu eta berrerabiltzeko gune ireki bat herritarren eskura jartzea da. Horretarako, tailerra jarri dugu martxan. Ekarri zure bizikleta eta konponduko dugu, errebisioa pasako diogu, zure bizikletaren bertsiorik onena emango dizugu bueltan.
Txirrindularitzaren inguruko kultura zabaltzeko xedea ere badu Gurpilguneak. Askotariko tailerren bidez (mekanika, bizikletan ibiltzekoak…), gurean hain errotuta dagoen kirolarekiko zaletasuna transmititu nahi dizugu.
Badakigu asko garela txirrindularitzaren zaleak, eta komunitate irekia sortu dugu interes hori partekatzeko. Bizikleta irteerak eta, bizikletan ibiltzen ikasteko ikastaroak… Denontzako dago tokia.
Gurpilgunearen beste ardatzetako bat da inguruarekiko konpromisoa. Tolosaldean errotuta gaude, eta bizikletaren inguruko informazioa bildu eta partekatzen dugu, bertara ekarria: bidegorri sarearen mapa, aparkalekuen kokapenak, bizikletaren inguruko arautegia eta legeak, dendak, inzidentziak…
